زراعتي في مصر د. شادي المغربي بتاريخ 19-5-2015

ya rp قال:

سلام عليكم

الحمد لله اخيرا عملت العملية
ومبدأيا عمري ما توقعت اعملها في مصر

مقدمة مالهاش لازمة

مشكلتي بدأت بتراجع في خط الشعر الامامي(او جبهة عريضة) بدأ وانا في سن صغيرة واستقر علي كده ومتراجعش تاني
لكن الحمد لله معانيتش قبل كده من تساقط في الشعر او ضعف عام
جربت علاجات طبية كتيــــــــــــــر جدا وواظبت ورحت لدكاترة كتير وكبار وبرده مفيش نتيجة
سمعت عن زراعة الشعر الطبيعي من 4 سنين تقريبا ودخلت المنتدي ده بس مكانش فيه تجارب كتير
اللي كنت عاوزاه اني الاقي دكتور كويس في مصر
بس للاسف كل اللي شفته كان بالنسبالي تجارب مخيبة ولان فكرة السفر بالنسبالي في الوقت ده مكانتش تنفع قفلت الموضوع
بس من سنه ونص تقريبا رجعت افكر في الموضوع تاني وكان مسببلي ازمة نفسيه

كل تفكيري كان في تركيا وفعلا بدات اجراءات السفر وبدات ادور
راسلت منسق مركز مشهور جدا اكيد كلكو عارفينه وعارفين مشكلة المنسق بتاعه مردش فبعت شكوي للمركز بعدها رد المنسق و بعت تاني كذا مرة مكانش في اي رد
فكرت ابعت للمركز تاني بس اتدايقت قلت مش هعمل عندهم حتي لو ردو
بعدها فكرت في رويال هير
راسلت المنسق وكان في منتهي الذوق وكنت مقررة بس معرفتش اخلص ورق السفر
زعلت بس قلت اكيد خير

بعدها فكرت في السعودية وبدات اقارن كتير وادور علي النت من جديد
و لقينا علي النت ان في دكتور كان شغال بره جه مصر من فترة قصيرة ..د شادي المغربي
بس برضه مفكرتش في مصر من كل اللي كنت بسمعه

الحمد لله انا كنت بصلي استخارة كتيـــــر جدا
وسبحان الله في يوم حلمت حلم والله اقل من ثانية ماما بتطبطب علي كتفي وبتقولي توكلي علي الله وروحي لشادي المغربي
(لو مكانكم مش هصدق )
استغربت اكيد

بس بدأت ادور علي تجارب ليه وادور في السي في بتاعه عرفت انه دكتور جلدية وعامل (دكتوراه او ماستر) في زراعة الشعر و عضو في ishers

وشفت تجارب نازلة عنده بعد 10 ايام وبعد شهر وبعد 6 شهور كلها كانت حلوة بس ملاقيتش تجارب هنا في المنتدي
المهم قررت اروح واجرب وبصراحه لما رحت ارتحت وحسيت بامانه في التعامل سالته المساحة دي مستاهلة زراعه ولا لا قاللي دي حاجة بترجعلك انتي نص الناس كده وعايشين بيها طبيعي وناس تانيه لا بس هي لو هتتعمل هتحتاج حوالي 1200 جرافت
قلتله اني كنت ناوية اعمل في السعوديه عند د فلان قاللي ده حبيبي وممتاز هو بيعمل بالشريحه قلتله انا كنت بفضل الشريحة (علشان الحلاقة) قاللي لا للاسف احنا هنا بنعمل اقتطاف بس وشرحلي الحلاقة بتم ازاي

عموما محستش باسلوب ترويج او نظام (امسك في الزبون) :emoji40:

رسم خط الشعر الامامي وطبعا سالته السؤال المعتاد.. مينفعش تنزل عن كده ؟
قالي لا اكتر من كده هيكون مش طبيعي وشكلها كده متناسق

وشفت عنده فيديو لواحد بيتكلم بنفسه وماشاء الله النتيجة ظهرت عنده من 3 شهور ل 6 شهور وده طمني طبعا

قعدنا كتير واستفسرت عن كل حاجة وبعدين رجعت وانا مرتاحة و شبه مقررة اني اعملها
وبعت التحاليل للمركز وحددنا معاد العمليه 19-5



تفاصيل العمليه

اسم الدكتور : شادي المغربي
عدد الطاقم : 4 (2 دكاترة و 2 ممرضات )
مدة العملية : مقدرتش احدد
طريقة الزراعة : Fue
البصيلات المستهدفة : 1200
البصيلات المزروعة 1208
البنج: موضعي
تكلفة العمليه : 14 الف مصري بس هو عمل ديسكاوند ل 12
الفحوصات : الفحوصات العادية

يوم العمليه لقيت ان الحلاقة الجزئية هتتغطي تماما بباقي الشعر ودي حاجة ريحتني جدا :emoji9::emoji9::emoji9:
النقطة دي مهمة للبنات : بدا الدكتور ومعاه الممرضتين بالحلاقة هو حلق من اسفل الراس بس ساب خصل تحت المنطقة المحلوقة وعلي الجنبين وباقي الشعر فوق فبقت عبارة عن دايرة في نص الشعر مش بتبان ابدا لما بلم شعري كله الحمد لله
البنج طبعا متعب بس مكانش بالحقن ... هو بدا بجهاز معين (مشفتش شكله) بيبعت زي خبطات في الجلد علشان يخدره الاول ودي بتوجع شوية وبعدها بيحقن البنج بالحقن العاديه بس دي مبتوجعش لانها بتكون شبه اتخدرت

د شادي بيعمل الاقتطاف كله وبيكون معاه د هيثم (بس مش عارفة هل بيعمل معاه او لا لاني مكنتش شايفة)

عمل اقتطاف 600 وبعدها ريست صغير وبعدها 608
وبعدها اخدنا بريك للغدا

بعدها بدا د شادي بفتح القنوات كلها

وبعد كده دهيثم مع الممرضتين بداو يزرعو البصيلات
وكان د شادي بيجي يبص كل فترة
وفي الاخر جه تقريبا كان بيكمل معاهم زرع وبعد العمليه حط كذا واحدة في اماكن مختلفة (قال انه علشان تدي منظر طبيعي)

اكيد مش هقدر احدد نجاح العملية دلوقتي بس انطباعي الفريق كله ذوق جدا الممرضتين معاملتهم لطيفة اوي
الشغل كان منظم التعقيم مفيش مقياس اقيس عليه بس كان حلو و بشكل عام مكانش في سلبيات

بعدها صرفنا الادوية
حقنة واحدة(كورتيزون تقريبا مش فاكرة) و مضاد حيوي سبراي واقراص

رابع يوم العملية لسه في اماكن فيها اثار البنج مش حاسة بيها
كان في تورم بسيط في الجبهة مفروض ليهم مساج معين الدكتور قالي عليه وبدأ يقل الحمد لله
وفي ألم في المنطقة المانحة

الملخص ... انا الحمد لله مرتاحة نفسيا ومبسوطة جدا اني خدت التجربة وبدعي ربنا يكملها علي خير واكيد النتايج لسه مش دلوقتي بس الحمد لله عندي امل كبير
وكل ما بفتكر يوم العملية بحس براحة
نصيحة بجد اي حد بيفكر في الموضوع صلي استخارة كتير وسيبها علي ربنا وخد الخطوة

ان شاء الله هحطلكم تفاصيل اي حاجة جديدة الاحظها
دعواننكم :emoji9::emoji9::emoji9:

أنقر للتوسيع...