السلام عليكم ورحمة الله وبركاته
الحمد لله تمت عمليه الزراعه لدى مستشفى estethica في الجزء الاسيوي في منطقة اتاشاهير في في 1 أبريل 2015
طبعا انا اخترت هالمستشفى من قبل صديقي عمل العمليه عندهم قبل شهر تقريبا ونصحني فيهم وانا اثق فيه
لانه ما شاء الله عليه دقيق جدا ومهتم للموضوع جدا وعمل بحث قبل الذهاب فوفر علي الوقت والتفكير
فتوكلت على الله وكلمت صديقي يعلمني طريقة التنسيق معهم والاجراءات
قال ما عليك انت عزم وبعطيك رقم المنسق هنا بالرياض ويكون كل شي عليه انت بس ادفع المبلغ كامل له شامل العمليه والسكن و الاستقبال من المطار والتنقلات من المستشفى والفندق واذا تبي جوله سياحيه بلغه عشان يحسبها لك من ضمن الباكيج
قلت ثقه الرجال
قال انا قدامك الحين سويتها قبلك
قلت اوكي
كلمت المنسق طبعا سعودي هنا بالرياض شقردي الصراحه ما قصر واخلاقه عاليه
قلت له انا نويت اسوي زراعه عند نفس دكتور صديقي
قال اوكي
قالي ارسلي صور لراسك عشان يرسلها للدكتور عشان يقيم حالتك ويشوف المنطقه المانحه
قلت ابشر
وهذي صوري قبل العمليه
ما كمل ساعه الا وهو راد علي جزاه الله خير
قال المنطقه المانحه عندك ضعيفه وشعرك خفيف والفراغات كبيره
وتحتاج عمليتين وحده الان والثانيه بعد سته شهور
نغطي بالاوله المنطقه الاماميه والثانيه نغطي الباقي مع تكثيف
قلت توكلنا على الله يصير خير
قلت للمنسق طيب الحين كيف الاجراءات
قال انت متى حجزك عشان نشوف المستشفى ما يكون عليه زحمه قلت انا بمشي بعد اجازة الطلاب المهم ضبطنا الحجز علـي 1 ابريل وكانت التذاكر للاسف غاليه والحجز مزدحم بس لا تراجع
الدفع كان للمنسق هنا كامل المبلغ وهو تصرف معهم حولهم المبلغ وضبط السكن بجانب المستشفى ما يستغرق الذهاب له بالسياره اكثر من 10 دقائق حتى مشي تقدر تروح له وهو هذا اقتراحه انو الفندق يكون بجانب المستشفى بالجانب الاسيوي
اولا لقربه من المستشفى ثانيا القسم الاسيوي يمتاز بالهدوء على عكس الاوروبي زحمه وضجه
باقي علي بس مؤونه الاكل الغدا والعشا بما انو الفطور شامل الباكيج
طبعا على حسب حالتي كلفت العمليه بدون ابرة البلازما وسعي الرجال مع السكن والتنقلات حوالي 11100
حولتها له على حسابه
طلعت التأشيره عن طريق النت وخلصت اموري
وتوكلت على الله وطرنا الى تركيا
وصلنا بحمد الله ورعايته لتركيا وكان الجو معتدل لابسين حتى صيفي ما توقعت كان باستقبالنا المترجم سوري الجنسيه بس كان طيب وخجول وركبنا مع السواق كان يجيد الانجليزيه
كانت السياره فلكس واجن فان مريحه جدا
المشكله اللي واجهتنا بالبدايه البعد لانو دخلتنا لتركيا وقت انتهاء دواماتهم فكانت الزحمه لا تطاق والمطار في الاوروبي والمستشفى في الاسيوي
فجلسنا تقريبا ساعتين على ما وصلنا
وصلنا للفندق كان في منطقه هادئه وجميله وممتاز ونظيف
ريحنا فيه واليوم الثاني رحت للمستشفى مع السواق وكان عند موعده حتى السواق جزاه الله خير حرصني يوم حطنا امس بالفندق اني افطر زين عشان العمليه وطولها
وصلت المستشفى وكان قريب جدا دخلت على الدكتور اسمه محمد ابو عزب عربي يعني هنا انتهى دور المترجم
كان ودود وحبيب قالي وريني الشعر شافه وطلع نفس الكلام اللي قاله لي بالرياض
قال ممكن اسوي لك جلسه وحده واغطي لك الفراغات للخلف بس من منبت الشعر الموجود الان
او اني اسوي لك عمليه الان وبعد سته شهور العمليه الثانيه بحيث الاولى اقدم لك خط المقدمه واكثف لك الامامي الثانيه اكمل لك الفراغ اللي ورى مع تكثيف
قلت اوكي خلنا على الثانيه
جات الممرضه اخذت عينة دم للفحص وقاسو ضغطي وبعد ما طلعت النتائج جات الممرضه ورسمت الخط لي بعدين جا الدكتور وشيك وزاد الخط وقال شوف بالمرايه هذا اكثر شي ممكن يصير طبيعي بحسب مساحة الوجه
قلت اوكي عطوني بعدها حبه للريلاكس مهدئه
بعد شوي رحت مع الممرض الخاص بالحلاقه و تبديل الثياب والغسيل الى غرفة الغيار وفصخت الفانيله اللي انصح انك تجيب قميص معك بدال التيشرت اسهل في اللبس والنزع خصوصا بعد العمليه وعطاني مفتاح الخزنه حقت الملابس
ودخلنا غرفة العمليات طبعا فهمني الدكتور انو العمليه بتم على مرحلتين
الاولى نزع البصيلات وتكون نائم على بطنك وكانت فعلا ممله تقريبا ثلاث ساعات
والثانيه غرسها وتكون على ظهرك وكانت اريح حتى اتوقع اني غفيت كذا مره
يتخللها بريك غدا وراحه
الالم طبعا كان بالابره وقت ادخال البنج وليس غرزها بالبدايه فقط وبعدين ما راح تحس بشي ابدا ان شاء الله لدرجة اني اقولكم اني غفيت احيانا
حتى الالم مو مره
عااااااااادي بس حرقه خفيفه وقت ادخال البنج فقط
العمليه تكون تحت اشراف الدكتور يجي يطل كل شوي عليك اللي قام بالعمليه الممرضات وكانت يديهم خفيفه وسريعه ما شاء الله
وقت الغرس صراحه كنت من طول المده والملل ما ني متاكد هل الدكتور هو من قام فتح القنوات او الممرضه لاني ابي اخلص بس كان ما شاء الله يده خفيفه وسريعه
انتهينا الحمد لله وتم وضع الكريم على المنطقه المانحه والضاغط الحامي بعد الله من نزول البنج على الوجه
وشافني الدكتور وقال خلاص انت الحين روح ريح بالفندق لا تجهد نفسك اليوم ومتى ماشي قلت بعد بكره
قال كويس قبل ما تمشي للمطار تعال نغسل راسك ونعلمك الطريقه وبعض التعليمات
قلت اوكي
رجعت للفندق والحمد لله ليس هناك الام
وجلست ساعه لين ضبطت وضعيه النوم وانا جالس
والحمد لله نمت نومه زينه
اليوم الثاني بعد العمليه سويت جوله لمدة 8 ساعات حسب الباكيج
اليوم الثالث بعد العمليه رحت للمستشفى وعملولي غسيل وعلمني الدكتور الطريقه وعطاني ورقه فيها تعليمات بالعربي استمر عليها
حاجه ثانيه سألته عن الابره قال عادي اعطيك اياها تكلفتها 200 يورو
بس قال موب لازم اهم شي زراعتك كويسه واعطاني بخاخ بديل قال هذا يغنيك عنها تبدى تستخدمه بعد شهر لمدة سته شهور وتوقفه بتغنيك عنها وسعره ارخص من الابره تقريبا 880 ريال تشتريها من عندهم تقريبا كم عبوه تكفيك لمدة سته شهور
قلت طيب بخاخ الميو كسيديل ما دري وش اسمه
قال لا هذا ما انصحك يسبب تساقط اذا وقفته خليك على هذا
وبس
نجي الان للصور بعد العمليه
وهئا البخاخ الموصوف لي
وهذا الدكتور والسواق
المستشفى ما شاء الله نظيف وفي منطقه هادئه واللي ريحني اكثر كثرة المراجعين فيه من جنسيات مختلفه من اوروبا وحتى اتراك شفتهم مسوين زراعه فيه
واي استفسار انا حاضر
دامت شعوركم للابد
