اجزم ميه في الميه ان هالموضوع دعايه واضحه
واعتقد ماحد سأل عن شهادات الدكتور ولا
هوه استاذ مشارك في الامراض الجلدية
واستشاري جراحة الجلد والليزر
واستشاري زراعة الشعر
يعني مش بس خبرة هوه اصلن الوحيد الحاصل على دبلوم عالي في زراعة الشعر على حسب علمي بحكم اني اعمل في المجال الطبي ولست طبيب
هههههههههههههههههههههههه مابعد كلامك هذا كلام لكي اجزم ميه في الميه انها دعايه
ما شاء الله حاصل على دبلوم غالي في زراعة الشعر وهو الوحيد بعد مسوي احصائات ما شاء الله عليك
عموما خلونا في المهم حتى لايفهم اني اسوي دعاية للدكتور لكني انصح بشده ان اي شخص يجري العملية عنده
هههه كاد المريب ان يقول خذوني .. وتقول اخاف يفهمون دعايه بس تنصح بشدة ههههههههههههههه الا دعايه ونص ياحبيبي
والدكتور عبدالمجيد عنده فريق رائع ومحترف للغاية صح ان بعضهم يأتي من خارج العيادة لكن النتجية مميزة ولله الحمد
ومازالت الدعاية مستمرة
دعاية دعاية دعاية دعاية ميه في الميه دعايه ياشباب ولاحد يصدق
عموما ياصاحب الموضوع :
هذا موضوع قديم لي عن الدكتور العجلان وتجربتي معاه والموضوع موجود في قسم الزيارات
=========================
السلام عليكم ورحمة الله وبركاته
اولا اشكر القائمين على هالمنتدى الرائع اللي اصبح هو المرجع الاول لكل الاشخاص اللي يعانون من الشعر في الوطن العربي عامة وفي الخليج والسعودية خصوصا.
اولا سبب كتابتي لهالموضوع ماهو التشهير باحد او الادعاء على احد بقدر ماهو توضيح الحقيقه للأخوان لان الهدف لنا كله واحد وهو ايجاد الحل الامثل للجميع والاستفاده من التجارب ..وطرحي هذا والله ماتشوفون فيه الا الحقيقه ولن اظلم لا ميديكا ولا العجلان فيه لكن احقاقا للحق واظهارا للباطل
انا سجلت معاكم في المنتدى وناوي ازرع شعر ان شاء الله خارج المملكة لكن قلت ليش بدل ما اسافر ما اروح لعيادات داخل السعودية..والعجلان دكتور سعودي قلنا نجرب اكيد سعودي وماهمه المادة والكسب وبيكون صادق..( ثقة فيه كسعودي)... يمكن الله يجعل الحل على يدينهم بدل الواحد مايسافر ويتكبد عناء وتكاليف السفر.
حجزت موعدين واحد مع الدكتور عبدالمجيد العجلان- وكان الموعد اليوم بتاريخ 19-3-2012 الاثنين الساعة خمسة وربع عصرا ..وموعد اخر مع بسام في العالمية ولكن بعد اللي شفته من العجلان شكلي باكنسل الا اذا وجدنا مركز فعلا فيه مصداقية قبل الكسب المادي..والنصب
اتصل علي المركز وقالي لو حاب موعدك يكون خمسه وربعة او ثنتين ونص وقلت لهم خمسة وربع وفعلا جا اليوم الاثنين وذهبت لهم الساعة خمسة وربع..طلعت الدور الاول..وعبيت الملف ودفعت قيمة الكشفية ثلاثمائة ريال ..اللي لو كنت ادري مادفعت ريال واحد ..لانه حرام فيهم بكل امانة.
انتظرت في الانتظار لمدة عشر دقايق وجاتني السستر ونادت اسمي ودخلتني مكتب وجلست في المكتب لمدة نصف ساعة الى خمسة وعشرين دقيقه اناظر في الجدران واتأمل اثاث المكتب وانا هنا اصر على كلمة مكتب وليس عيادة...دخل علي الدكتور بعد خمسة وعشرين دقيقه الى نصف ساعة.
من هنا بدت المشكلة الدكتور اول مادخل كان واقف لم يجلس حتى على مكتبة وباين عليه كان مشغول مع احد ثاني ويبي يخلصني ويرجعله بسرعه
وقف معي ( مفروض اقول جلس معي بس هو ماجلس لحد الحين) قالي انت فلان ؟ اول مره تجي هنا
قلت ايه اول مره اجي هنا ..قالي وش مشكلتك؟
قلت له دكتور لايكون مستعجل بس قال لا لا بالعكس كانه انتبه لنفسه ان الدعوه كشفيه وفلوس مدفوعة وانه واقف ومستعجل كانه يسولف مع واحد عند اشارة
جلس اخيرا طويل العمر وقلت له مشكلتي صلع ..قالي على طول مباشرة وبالحرف الواحد اول ماشاف راسي نبي نسوي لك زراعة على دفعتين بطريقة الشريحة بين كل زراعة زراعة ست شهور...جيت بقاطعه عشان اسألة انا باي مرحلة ..ماتركني حتى اتكلم قطع كلامي ونادى السستر تجيب اللاب توب..وكان اسلوبه جدا جدا جدا سيء في الكلام وماهو شايف اللي قدامه شيء..يابن الحلال كل هالمعلومات اعرفها من النت مايحتاج تشرحلي..المهم قالي ان فيه دكاتره سعوديين يلعبون على الناس وان فيه واحد دافعومادري ايش يعني اسلوبه حسيت فيه حش بالناس 30 الف ريال وانلعب عليه في النهايه وانه لما جا لعيادةا لدكتور العجلان وضح للمريض انه انلعب عليه وان نص الشعر طاح عنده وراحو رجعوله الفلوس.
لما اجبرني اننا ندخل بموضوع انه يشرحلي اضطريت اسكت لين يخلص كلام وبعد ماخلص الشرح ..قلت له يادكتور انا مابي شريحة ابي اقتطاف لان صلعي صحيح كبير بس المنطقة المانحة كبيرة جدا وماعندي مناطق بيضاء كبيره..قالي انت المنطقة المانحة عندك ممتازة جدا لكن لايغرونك بالكلام والدعايات والتسويق لطريقة الاقتطاف لان على حسب كلام الدكتور...
الاقتطاف فيه مشكلة كبيره وجلس يشرحلي ان الاقتطاف فيه مشكلة كبيره وهي انهم لو جو بيقتطفون
2500 شعره على سبيل المثال ممكن خمسيمية شعره تطلع بدون بصيلة لان الشعرة ممكن طريقة دخولها داخل الراس بطريقة مايلة فما يقدرون يقتطفون البصيلة ..لذلك هو ماينصح بالاقتطاف رغم زعمة بان عندهم اقتطاف وجلس يقول ان عندهم اقتطاف بس ماينصح فيه..على فكرة للحين انا كنت مجهز اسألة بالجوال وانتظره يخلص كلامه اللي قادني له عشان استعرض اسألتي بشكل سريع واستفيد من الكشفية
المهم كل هالكلام ياشباب كان في خلال من 10 الى 15 دقيقة بالضبط والله ماهي اكثر وكلها كان هو يسيرها بنفسة ماتركلي فرصة اتنفس او اسأل كانه يتهرب من شيء مادري وشو او انه مستعجل ويبي يرجع للمريض الثاني
المهم قالي لحظه وانحاش بعد ماجلس معي فقط فقط 10 الى 15 دقيقه وتراني اقول كذا عشان ما اكون ظلمته لكن والله يمكن اقل بس يالله خلنا نقول 15 دقيقه
المهم طلع وحتى ماقالي بيرجع او مابيرجع او كم بيجلس طلع وانتظر
10 دقايق
20 دقيقه
30 دقيقه
ارتفع ضغطي خصوصا اني كنت بسأل عن اشياء كثيره..رحت كلمت السسترات برى واللي صراحه كان تعاملهم راقي جدا واحسن من تعامل الدكتور مليون مره لا مهنية ولا اخلاق او تعامل.
قالت لي ok sir i will call the doctor
انتظرت 10 دقايق ثانيه
جاني وهو باين على وجهه العصبية او انه متضايق ومتقروش ..قالي نعم يا فلان جاوبتك على الاسأله وكذا قلت له اوكي يالله انا ماشيء وشكرا وترا ماني جاي اشحذكم بدل ماتجي تقول اسف على التاخير ولاطعني نص ساعه جاي كاني اشحذك ومعصب وزعلان اني ناديت السستر لانك لطعتني...ولو كنت جاوبتني على الاسألة ليش تقولي لحظه وتتركني انتظر..ليش ماختمت معي ومشيتني مو تخليني انتظر..المهم انحشر ماعرف وش يقول
هو شكله متعود الناس يعطونه وجه ويسلكون له ولما شافني قله له الحقيقه انصدم وقالي هدي نفسك ومدري ايش ..انا اختصرت عليك..موضوع الشامبوهات وقلت لك مالها دخل بالتساقط..قلت له يابن الحلال من جاب طاري الشامبوهات انا مامداني اسألك عن شي
حتى كم يبغالي شعره او الصلع عندي باي مرحلة ماقلت لي انت عطيتني درس 10 دقايق ومشيت ترا كل هالكلام قارينه بالنت واليوتيوب انا جاي عشان تكشف على حالتي انا وتجاوبني عن وضعي انا مو عشان تسردلي كم معلومه عارفينها ابسط البسطاء في الشارع..
المهم ارتفع ضغطه وارتفع ضغطي وقلت له حلال عليكم الثلاثمية ريال..قال والله ماتمشي اجلس سألتك بلله تجلس ( كانه حس بغلطة) قله له مابغى شي انا ماشي وشكرا يادكتور عبدالمجيد والله تعامل جدا سيء وراح انشر تجربتي بالنت.
وهنا صارت الطامة الكبرى قال تدري كم المفروض اجلس معاك..؟؟ قلت له كم؟؟
قال بكندا نجلس مع الواحد ربع ساعه ولما تبي تجلس ربع ساعه ثانيه لازم ثلاثمية ثانيه
قلت له عادي ادفع ثلاثمية ثانيه ماهي مشكلة ( عشان احرجة لانه نصاب..وين فيه لازم تدفع ثلاثمية عن كل ربع ساعة..اجل الدكاتره بيتكلمون بالاعادة بالبطيء عشان يكسبون اكثر) قام يلف ويدور
قال وش اسألتك اللي مجهزها ( تخيلو اخيرا كانه بيتكرم علي وبيجاوبني عن حالتي)
قلت له اسألتي ماراح تاخذ دقيقتين ماهوب حتى 15 ساعه علما بانك حتى ربع ساعه ماجلست معي قمت تخطط على الكتاب وتشرحلي اشياء ماجيت اسألك عشانها وسحبت علي نص ساعه قبل ونص ساعه بعد..وانا ماطالبت بالثلاثمية ريال مع انها حقي انا قلت لك حلال عليكم وبمشي..لان
انتم ماعندكم احترافية ولا مهنية للأسف والمكتوب باين من عنوانة...
المهم
طلعت من عندهم وانا والله ما استفدت من الدكتور شيء الا حكاية طريقة الاقتطاف اللي ماجيت اسأل عشانها...وقالي الشامبوهات استخدم اي شامبو مالها دخل ..والطاقية والشماغ مالها دخل..وبس
نصيحة شباب اي احد عنده مشكلة بالشعر وناوي يزرع لايروح او يفكر يروح او يستشير الدكتور عبدالمجيد العجلان لان والله ما استفدت منه اي شيء وبتروح تدفع ثلاثمية ريال وياليته حتى يكلمك او يعطيك وجه عوضا عن انك بتستفيد او ماتستفيد من كلامه
لانه مايتكلم عن حالتك...لا يسردلك كم معلومة كلها والله نعرفها هنا ..
اقسم بلله انه مالمس راسي لمسة واحدة..
المهم شباب قطع الاعناق ولا قطع الارزاق ..انا مجرد طرحت تجربتي بكل شفافية و وضوح ومصداقية لان هالمراكز نصابين والله هدفهم الربح المادي ...طيب ياخي اربح ماقلنالك لاتربح..مستعد ادفع اي مبلغ بس احصل فايدة..لكن تنصب عينك عينك وتاخذ فلوس البيشنت بدون حتى تفيدة او تعطيه وجه مايصلح هالكلام..
قبل النهاية كلموني المركز ووضحت لهم كل شيء كانهم خايفين من وضعي لتجربتي هنا..ماهوب احتراما لي ..لكن والله لاحطها عشان يعرفون قيمة اي عميل يجيهم..وان كل ريال يدخل جيوبهم العميل منتظر مقابلة قيمة حقيقية ماهو كذب ودجل
وصدقوني هالمنتدى متابع ..وخلونا ياشباب نطرح تجاربنا بكل مصداااااااااااااااقية..لكي ينعكس على تعامل هالمراكز النصابين اللي مافيه شيء يخليهم يحترمونك او يخافون حتى على صحتك ولا وراهم لا رقيب ولا حسيب.
انا انضريت ومابغى غيري ينظر
اعيد واكرر.. مو شرط تجربتي تكون على الكل..ممكن واحد فيكم يكون تعاملهم معاه غير..اتمنى بس ما اتوقع لان البروفشينال بروفيشنال ..واللي يحترم مهنته يحترمها..مستحيل يتغير هالشيء...اللي يلطعك بدون اعتذار او تفهم..اهم شي خلاص دفعت بحريقة..اصرفك بكلمتين..
للأسف دكاترتنا مايعطون اهمية او احترام للي قدامهم..انا هالشيء مهم عندي الدعوه عملية وزراعة وتغيير لشكل الانسان وانت جاي واقف وتبي تنحاش..ولسانك مادري وش يبي ومعصب وتكذب عيني عينك بين كل كلمة والثانية يكذب والله ياشباب كذاب بمعنى الكلمة هالدكتور..
على فكرة طريقة الاقتطاف محتاجه مهاره لذلك مايحبونها لانها متعبة ومحتاجه وقت لان لازم يميل الجراح مع كل شعره مقتطفه عشان يقطف البصيلة بشكل صحيح مايكون قطف الشعره بدون البصيلة..لذلك المراكز المحترمة يجلسون 8 الى 12 ساعه ومايبونك تتحرك عشان يقطفون بشكل صحيح بينما حبايبنا يكذبون على الزباين ويقولون لهم ان الاقتطاف ماننصح فيه( تكفى يالبرفسور ياخبرة اربعين سنة بالمجال) والله من الدجة
الله يوفق الجميع واللي له اي تجربه مماثلة سواء مع هالدكتور او مع غيره يعلمنا من اجل نستفيد
ختاما موعدي الجاي مع بسام والله شكلي باكنسلة غسلت يدي بعد تجربتي مع العجلان وميدكا النصابين.حسبي الله ونعم الوكيل فيهم
=================================
اتمنالك الشفاء العاجل يا اخوي بس كفااااااية دعايات مانسمح بدعايات وخداع للاعضاء ..الدكتور عبدالمجيد مايعرف للإقتطاف اساسا..