اخوي 7amani انا زرعة ذقن عند ساركان اليوم السادس لي يوم غسلت بالشامبو حرقني بزياده اليوم.
ثاني شي أحس بشي زي الدبابيس خصوصا منطقه الشنب
وأبي احط المرطب بكره هل ينفع لأن جوانا جاف وبارد أحس وجهي متيبس .
آسف ع الإطالة
يا هلا والله
اول شي مبروك الزراعة وان شاء الله تجوف النتايج اللي ترضيك ♡
بخصوص الغسيل : اول شي تأكد ان طريقتك في الغسيل صحيحة او لا
الطريقة 1 : تاخذ غضارة وتحط فيها شوي ماي.. وتضيف عليه الشامبو بكمية كافية ؛ بعدين تحركه بإيدك شوي بعدين تضيف عليه ماي بدفع قوي ؛ بتتكون عندك رغوة اخذها ووزعها على المانحة وعلى اللحية( وخلها دقيقتين بالكثير! ) بعدين اخذ كوب ماي وصبه على الرغوة بطريقة هادية.
الطريقة 2 : تاخد علبة بيبسي كبيرة او علبة ماي كبيرة.. وتحط فيها شوي ماي وتضيف الشامبو ؛ بعدها ترج العلبة وبتصير عندك رغوة..بعدين نفس الطريقة توزع الرغوة وتخليها دقيقتين وتغسلها.
ملاحضة : الغسيل بالشامبو مرة وحدة في اليوم فقط!
بخصوص الحرقة انا ما صادتني من قبل لكن احتمال انك تخلي الرغوة وقت زيادة فحاول تغسل الرغوة في حدود الدقيقتين.. واذا كنت بالفعل تغسلها في حدود الدقيقتين ف كلم المنسق واستفسر منه اذا الوضع طبيعي او لا.
بخصوص الشعر اللي مثل الدبابيس : لا تحاتي ولا تشيل هم ؛ هذا الشعر ماهو الشعر اللي بينبت وبيطول ؛ هذا الشعر اللي كان في البصيلة وقت اقتطافها وبما ان وقت الاقتطاف المانحة تكون محلوقة ع الصفر يعني الشعرة اللي في البصيلة تكون واقفة وللحين ما طولت عشان تنحني ؛ فلا تحاتي بيتساقط الشعر هذا وبيطلع الشعر الجديد وكل ما يقوى ويطول يتحسن إتجاه الشعر.
بخصوص المرطب : التعلميات تقول تبدي تستخدمه في اليوم العاشر ؛ فما انصحك تجازف عشان جم يوم بس ؛ والتيبس هذا شي طبيعي وادري انه يضايق ؛ والله يشهد ان صار لي مثل موقفك وفكرت استخدم المرطب قبل اليوم العاشر لاني كنت منزعج من التيبس ؛ لكن سالت المنسق والدكتور فقال لي لا تستخدمه قبل اليوم العاشر.
فأنصحك انك تصبر كلها جم يوم وبتعدي ان شاء الله.. بعدها كل مرة تستخدم المرطب بتحس ان وجهك يتنفس وبتحس بإنتعاش وعادي تستخدم المرطب حتى بعد اسبوعين الغسيل وتقدر تواصل عليه شهر او شهرين مافي مشكلة.
بالتوفيق لك ان شاء الله وهذي كلها فترة وبتعدي وبترتاح بعدها ان شاء الله بس عليك انك تصبر ؛ وان شاء الله تجوف النتيجة اللي تطيب خاطرك ♡
تحياتي
