رد: تجربتي في زراعة اللحية والشارب / عيادة الدكتور سركان / 28 سبتمبر 2015
كثير من الاخوان يشتكون انه في مشاكل حصلت بعد زراعة اللحيه والشارب
ومخصصين موضوع لذلك في اعلى الصفحه
واهم هذه المشاكل
انه الشعر واقف
والاحمرار مستمر
وخصوصا بعد مرور سنه من الزراعه
فصراحه احترنا والله
يا هلا والله
بخصوص الاحمرار هذا ما يعتبر مشكلة فنية ؛ لانه يعتمد من شخص لشخص ويعتمد على عوامل كثيرة مثل : حساسية الجلد ومناعته ضد الاحمرار ؛ التعرض للشمس بكثرة يزيد الاحمرار ؛ استخدام البخاخ بعد اسبوعين او بعد شهر من العملية يزيد الاحمرار..؛؛ ويمكن بعد فيه شخص يتجنب كل هالاشياء وبعد يطول معاه الاحمرار ؛ يعني ما تقدر تحدد فترة معينة يختفي فيها الاحمرار ؛ واحب اذكر ان حتى لو طول الاحمرار سنة بيكون متغطي بالشعر ؛ كثافة الشعر تبدي من الشهر الرابع تقريبا ؛ يعني حتى لو بقى معاك الاحمرار للشهر الرابع بيكون متغطي بالشعر وما يبين.
وبالنسبة للشعر الواقف
ف هالمشكلة تصير لعدة اسباب مثل : فتحة القناة واسعة زياذة عن اللزوم ؛ او خطأ من الطاقم اثناء وضع البصيلة في القناة بدون مراعاة اتجاه الشعر ؛ والسبب الاخير هو عدم التزام الشخص بالتعليمات بعد العملية وعدم مراعاة الوقت المحدد لثبات البصيلة ؛ يعني على سبيل المثال يجوز ان الطاقم سوه شغله صح واتجاه الشعر مضبوط ؛ لكن الشخص ما التزم بالتعليمات ومثلا عرض المنطقة المزروعة للاحتكاك والبصيلات كانت غير ثابتة ؛ ف البصيلات راح تتحرك ويتغير اتجاه الشعر ويصير شكل الشعر واقف.
وانا بتكلم بحكم تجربتي مع طاقم الدكتور سركان لزراعة الذقن ؛ الصراحة الطاقم شغله ممتاز ويشتغلون بضمير وهذا اللي جفته منهم والله شاهد اني ما اجاملهم ومالي اي مصلحة اني اجاملهم ؛ وانا في البداية كنت متخوف اكثر شي من مسالة اتجاه الشعر وكنت انتظر نمو الشعر عشان اجوف الاتجاه واحكم ؛ والحمدلله رب العالمين طلع الشعر بالاتجاه الطبيعي بدون اي مشاكل ؛ ومثل ما قلت ان اللي جفته من الطاقم انهم يشتلغون بضمير وهم انا كنت حريص جدا بعد العملية وكنت ملتزم بالتعليمات.
في النهاية.. انا من وجهة نظري ان الالتزام بالتعليمات والحرص بعد العملية هو اللي يحدد نجاح او فشل العملية خصوصا اذا كان المركز له سمعة جيده وعنده تجارب كثيرة ناجحة.
تحياتي