تجربتي مع بادرا دبي.

[azzzz]

الصراحه تجربتي معاهم كانت سيئه للغايه, هذي العياده فيهم احتيال شديد ماتتوقع يجي من عياده صحيه. تجرتبي هذي كانت سيئه لعدة اسباب

1- احتيال في التسعيره في البدايه اذا كلمتهم في الواتس اب راح يعطوك تسعيره ب10000 او 9500. هذي التسعيره خلتني اقرر اني اسويها انا وصاحبي. بعد مادفعنا تذكرة السفر ووصلنا عندهم قالو لنا التسعيره بتكون12340درهم. بوقتها حنى خلاص سافرنا واستعدينا للعمليه فصعبه نرفض. فهذي حركه احتياليه سيئه منهم, يقولو لك انها بسعر وبعد ماتدفع التذكره انت وتسافر يغيرو هذا السعر لانهم يعرفو انها صعبه انك تقول لا علشان ماتضيع فلوس سفرتك. (اول صورتين فيهم السعر اللي قالوه لنا وصورة السعر اللي في النهايه دفعناه لهم)

الشيء الثاني في التسعيره اذا انت رايح لعياده صحيه بتسوي زراعة شعر راح تتوقع انهم يستقطفو العدد المناسب لاحتياجك. بس في العياده هذي هدفهم انهم ياخذو منك اكثر شيء. لهذا السبب انا حاسبين علي 12000 شعره على منطقة تاج الراس فقط, انا على بالي في البدايه التسعيره راح تبدأ كذا وبعدها راح تتعدل على حسب اللي اخذوه في النهايه بس من كلمتهم عنها في النهايه كانو يماطلوني وقالو لي انتظر وبعد كم يوم راح يحلون المشكله. الان انا انتظرت شهر وللحين ماحلوها. والان اللي اكلمهم صارو مايرد علي حتى. (صور لقبل العمليه وبعد العمليه وتشوف بنفسك اذا هذي فعلا 12000 شعره او لا)

الشيء الثالث في التسعيره ايضا انا سويت العمليه مع صاحبي وكل واحد دفع ثمن غرفه بس في النهايه حطونا بغرفه وحده ورفضو يرجعو فلوس الغرفه الثانيه اللي حاسبينا عليها

2-وصاخة الفندق انا جيت اسوي العمليه مع صاحبي وكل واحد دفع غرفه لنفسه. في البدايه قالو بس فيه غرفه وحده وراح تجينا الغرفه الثانيه بعد كم ساعه. اول غرفه دخلناها كانت مره وصخه. مره ماتنظفت بعد اخر واحد جلس فيها. كانت فيها زبايل والمخده فيها دم وحالتها حاله. كلمناهم وبعدها بنص ساعه فتحو لنا غرفه بدالها. الغرفه اللي بدالها كانت اوصخ من الغرفه الاولى. في النهايه قرننا ننتظر في الغرفه الاولى وبعدها بكم ساعه حطونا بغرفه ثالثه وقالو راح تجينا الغرفه الاخرى اللي دافعين فلوسها بكرا. من بكرا شيكنا عليها وقالو مافيه غرف متاحه. في النهايه جلسنا يومين بنفس الغرفه ولاعطونا الغرفه الثانيه ورفضو يعطونا تعويض عليها.

ملاحظه على الفندق: ماراح يكون فيها شامبو ولا صابون وبس راح يكون فيها فوطه وحده (الصور هذي كانت من اول غرفتين حطونا فيها)

3- جودة العمليه نفسها جودة العمليه نفسها بتكون انت وحظك. منطقة العمليات فيها غرف كثيره وكل غرفه راح يكون فيها ممرضه ومساعدة ممرضه يشتغلون عليك. عدد الممرضات ومساعداتهم مره كثير. ممكن 20؟ العمليه اللي تاخذ يومين كلها راح تكون مع الممرضه ومساعدتها. ماراح تشوف اي دكتور خلال العمليه او بعدها. هذا الشيء سيء لانك راح تعتمد ان الممرضه يكون شغلها تمام بدون اشراف. بتجربتي انا الممرضه كانت واضح انها متدربه حديثا وتحتاج اشراف من دكتور. العيادات الثانيه يكون الشغل مع الممرضه بس يكون فيه دكتور يشرف عليهم كل كم ساعه. الصراحه هذا الشيء مهم بس العياده هذي هدفها الكميه مو الجوده. هذا الشيء مهم مره عندي وانا مستغرب انه مافيه احد تكلم عنه في التقييمات

لانهم حاسبين علي12000 شعره رغم احتياجي لعدد اقل من هذا بكثير في النهايه بقى عدد فصيلات كثير ما انزرعو لان المنطقه المزروع لها تفللت. فيعني استقطفو شعر ماكان له داعي يستقطف... فهذا يثبت ان العياده بس تحاول تكثر السعر بدون احتياج, راح ارفع شكوى للوزاره الصحيه عن الموضوع لان العيادات الصحيه المفروض تكون فيها معاييرماتسمح بهذا الشيء .

4- خدمة العملاء سيئه للغايه وانا في العياده بعد ماخلصت العمليه و حاولت احل بعض المشاكل اللي تنحل (تعديل عدد الشعر للعدد المستخدم,مستحيل المنطقه الصغيره هذا تكون 12000 شعره) و(ترجيع فلوس غرفه الفندق اللي دفعناها وماعطونا اياها)
دخلت في المكتب عند خدمة العملاء وكان اسلوبه مره سيء. كان يدري ان رحلتي بعد كم ساعه فقال لي تعال بعد كم يوم للعياده نتكلم في الموضوع. قلت له ما اقدر لاني بسافر اليوم فقال خلاص اجل ما اقدر اساعدك. واسلوبه كان وقح وواضح انه ماكان يحاول يحل الموضوع

اللي في الاستقبال قالو لي كلمنا في الواتس اب وراح نحل المشكله وبس الموضوع كان بس مماطله. لان صار لي شهر اكلمهم وفي البدايه كانو يقولون ننتظر رد الخبير والحين صارو مايردو نهائيا

اخر صوره اخذتها اليوم. لسى فيه جروح حتى بعد الغسيل واتباع تعليماتهم 100%, شيء يثبت قلة جودة الشغل وقلة احتراف الممرضه اللي مشتغله علي وعدم وجود دكتور يصحح اخطائها ..

في النهايه اتمنى اكون ساعدة شخص ثاني انه مايمر عليه نفس تجرتبي ويختار عياده ثانيه فيها ضمير وهدفهم مو تكثير عدد العمليات بدون اهتمام في الجوده

 

[hairbah]

شكرا على التنبيه و لو كنت مكانك لالغيت العملية و اطلب تعويض تذكرة السفر لانهم اخلوا بالاتفاق